താഴത്തങ്ങാടി: കോട്ടയം മത്സരവള്ളംകളിക്ക് വിപുലമായ ഒരുക്കങ്ങളാണ് സംഘാടകരായ കോട്ടയം വെസ്റ്റ് ക്ലബ് ഒരുക്കുന്നത്. 27നാണു വള്ളംകളി. ആറിന്‍റെ ഇരുകരകളിലുംനിന്നുകൊണ്ട് വള്ളംകളി സുഗമമായി വീക്ഷിക്കാന്‍ വേണ്ട ക്രമീകരണങ്ങള്‍ കോട്ടയം നഗരസഭ, തിരുവാര്‍പ്പ് പഞ്ചായത്ത് എന്നിവരുടെ നേതൃത്വത്തില്‍ പുരോഗമിച്ചുവരുന്നു.
ഫിനിഷിംഗ് പോയിന്‍റിനുസമീപം ആഴം കൂട്ടുന്നതിനുള്ള ജോലികള്‍ ആരംഭിച്ചു. മുഖ്യ പവലിയന്‍റെ ജോലികള്‍ വരുന്നദിവസങ്ങളില്‍ ആരംഭിക്കും. 350 പേര്‍ക്ക് ഇരുന്ന് വള്ളംകളി കാണുന്നതിനുള്ള ക്രമീകരണങ്ങള്‍ മുഖ്യപവലിയനില്‍ സജ്ജമാക്കും. മത്സരങ്ങള്‍ക്ക് കൃത്യത ഉറപ്പാക്കുന്നതിനുള്ള സ്റ്റില്‍ സ്റ്റാര്‍ട്ടിംഗ് സംവിധാനവും, ട്രാക്ക്, ഫോട്ടോ ഫിനിഷ് സംവിധാനം എന്നിവയും ക്രമീകരിക്കും.
സാംസ്‌കാരിക ഘോഷയാത്രയും വഞ്ചിപ്പാട്ട് മത്സരവും
വള്ളംകളിക്ക് മുന്നോടിയായി സാംസ്‌കാരിക വിളംബര ഘോഷയാത്ര വള്ളംകളിയുടെ തലേദിവസം 26നു സംഘടിപ്പിക്കും. ഉച്ചകഴിഞ്ഞ് 3.30ന് ഘോഷയാത്ര അറപുഴ കോട്ടയം വെസ്റ്റ് ക്ലബില്‍നിന്നാരംഭിച്ച് ഫിനിഷിംഗ് പോയിന്‍റില്‍ എത്തി ആലുംമൂട് ജംഗ്ഷന് സമീപമുള്ള മാര്‍ ബസേലിയോസ് മാര്‍ ഗ്രീഗോറിയോസ് പള്ളിയങ്കണത്തില്‍ സമാപിക്കും.
ഘോഷയാത്രയില്‍ ലഹരിമുക്തി സന്ദേശം നല്‍കുന്ന ഫ്‌ളാഷ് മോബ് കോട്ടയം ബസേലിയോസ് കോളജിലെ വിദ്യാർഥികള്‍ അവതരിപ്പിക്കും. തുടര്‍ന്ന് 6.30ന് ആറിന്‍റെ മധ്യഭാഗത്തായി ക്രമീകരിക്കുന്ന പ്രത്യേക സ്റ്റേജില്‍ വഞ്ചിപ്പാട്ട് മത്സരം നടക്കും. വഞ്ചിപ്പാട്ട് മത്സരത്തില്‍ പുരുഷ-വനിതാ ടീമുകള്‍ പങ്കെടുക്കും.
വള്ളംകളി പാസുകള്‍
വള്ളംകളി സുഗമമായി മുഖ്യപവലിയനിലിരുന്ന് കാണുന്നതിനുള്ള പാസുകള്‍ ലഭ്യമാണ്. സ്റ്റാര്‍ട്ടിംഗ് പോയിന്‍റിലും ഫിനിഷിംഗ് പോയിന്‍റിലും പാസുകള്‍ ലഭ്യമാണ്. പാസുകള്‍ ലഭിക്കുന്നതിന് ഫോൺ: 9846885533, 9249912652, 6235704747
ക്യാപ്റ്റന്മാരുടെ യോഗം നാളെ
ചെറുവള്ളങ്ങളുടെ രജിസ്‌ട്രേഷന്‍ നാളെ അവസാനിക്കും. വൈകുന്നേരം 4നു ക്യാപ്റ്റന്മാരുടെ യോഗവും ട്രാക്ക് ആന്‍ഡ് ഹീറ്റ്സ് നിര്‍ണയവും കോട്ടയം വെസ്റ്റ് ക്ലബ് ഹാളില്‍ നടക്കും.
